Netfang: sigga@syngja.is
Sími: 868 9858
Nám
Sigríður Aðalsteinsdóttir söngvari og söngkennari stundaði söngnám á Íslandi, við Söngskólann í Reykjavík og síðar söng- og leiklist við Tónlistarháskólann í Vínarborg þaðan sem hún lauk námi með hæstu einkunn sem óperusöngvari árið 2000.
Hún lauk kennslu- og uppeldisfræði frá Kennaraháskólanum haustið 2004 og hlaut kennsluréttindi frá Menntamálaráðuneytinu það sama haust. Árið 2013 lauk hún meistrarnámi í stjórnun og stefnumótun frá Háskóla Íslands. Rannsóknarverkefni hennar fjallaði um meðvirkni hjá starfstéttum á Íslandi.
Kennsla
Sigríður hefur kennt söng frá árinu 2002. Hún kenndi við Tónlistarskólann á Akureyri frá 2002 – 2007, við Söngskóla Sigurðar Demetz frá 2007 – 2014 og hefur starfað samhliða á eigin vegum frá 2010 þegar hún stofnaði Syngja.is. Syngja.is var stofnað með það að markmiði að bjóða uppá sveigjanlegt söngnám sem er aðgengilegt fyrir alla sem vilja rækta röddina sér til ánægju og/eða heilsubótar. Síðast liðin tvö ár hefur Sigríður starfað við kennslu í Giljaskóla og unnið þar m.a. að skapandi verkefnum tengdum íslensku og Fiðringi.
Söngferill
Sigríður söng frumraun sína árið 1997 við Þjóðaróperuna í Vínarborg þá enn í námi og starfaði sem lausráðin söngvari við húsið fram til 2002. Hún flutti heim til Íslands 2001 og hefur síðan þá starfað við söngkennslu og sem söngvari. Meðal hlutverka sem hún fór með við Þjóðaróperuna má nefna Mercedes í Carmen, þriðja dama í Töfraflautunni og Fjodor í Boris Godunov. Á Íslandi hefur Sigríður haldið fjölda ljóðatónleika og sungið á sviði Íslensku óperunnar, með NorðurÓp, og Óp-hópnum. Meðal hluterka hennar hér heima eru þriðja dama í Töfraflautunni, Marcellina í Brúðkaupi Figarós og Miss Grose í Turn of the Screw. Hún var einn einsöngvara í “Óperuperlum” sem Íslenska óperan setti upp 2007. Hún hefur komið fram með Sinfóníuhljómsveit Íslands, Sinfóníuhljómsveit Norðurlands og Sinfóníuhljómsveit unga fólksins. Einnig hefur hún komið fram með fjölda kóra, starfað með tónlistarhópum og tekið þátt í tónlistarhátíðum.